රැහැයියෙකු ගෙන ආ තෘප්තිමය ආනන්දය - කාලාන්තරාව - THE DRAGONFLY EFFECT

             

        රැහැයියාගේ (බ්ලොගර්ල දන්න විදිහට හෝබෝ ටික්කාගෙ) අලුත් පොත මේසය උඩට පියාඹා විත් බොහෝ දිනක් ගත විය. නව ස්ථාන මාරුව හේතුවෙන් මේසය කොණකට වී ලැග් ගැහෙමින් උන් එය ට කාලතරණය කළ හැකි නම් නැවත එයට හිමි නියමිත තැනටම යනවා ඇත. කොහොම හරි පොත කියවා අවසන් කළේ ඊයේ හවසය. මේ සටහන ලියන්නේ අදය. මොළයට වැටී තිබූ සමනල ගැට ටික ලෙහාගන්නටම බොහෝ වෙලාවක් දෙන්නට සිදු වූ නිසාය.

    විද්‍යා ප්‍රබන්ධමය වියමනක් වූ "කාලාන්තරාව" අමාලි අනුපමා මල්ලවාරච්චිගේ නවතම පරිකල්පනිය ප්‍රයාමයයි. ඇැගේ පූර්ව කෘතිය වූ "දං පඳුරට ආ රැහැයියා" එකට කැටි කොට  ගෙන ආ වියමන් කිහිපය මා තෘප්තියට පත් කළා වූ මතකය කාලාන්තරාව කියවීමට මා  පෙළඹවීමට තරම් උත්තේජනයක් සැපයුවේ ය. සැබැවින්ම "කාලාන්තරාව" මා බලාපොරොත්තු කඩවීමකට ඇද දමන්නට තරම් සැහැසි නොවීය. අමාලි ඇගේ මනස් සෘෂ්ටිය නියමාකාරයෙන් වචන බවට පෙරළා ඇත. ඇය ඇගේ බුහුටිමය වදන් වියමනෙන් පාඨකයා සිය කෘතිය තුළට ඇඳ බැඳ තබා ගැනීමට සමත් වී ඇත. එහෙයින්, "කාලාන්තරාව" අතට ගන්නා ඔබට මා අනතුරු අඟවන්නට කැමැත්තෙමි. ඔබ මුලපුරන්නේ වචන වලින් නිමවන ලද ජිග්සෝ පසලයක් විසඳීමටය. එය විසඳා ගන්නේ නම් ඔබ අපුර්ව විද්‍යාප්‍රබන්ධමය මනස් සෘෂ්ටියක ගිලෙන්නේය.

    එක පෙළට පෘථිවිය පෙලන්නට වූ වසංගත රැල්ලක් හේතුවෙන් එක්තරා විද්‍යාඥවරියක් විසින් ප්‍රතිවෛරසයක් නිර්මාණය කරයි. ඒ ප්‍රතිවෛරසයෙහි ක්‍රියා කාරීත්වය ඇය විසින්ම සාදා ගන්නා ලද කාල ප්‍රශස්තකරන යන්ත්‍රයක් හරහා විමසා බලන ඇයට එකී ප්‍රතිවෛරසය නිසා අනාගත පෘථිවිය ජෛවීය සංහාරයකට මුල පුරන වගත් ඒ හේතුවෙන් මළ නොමළ වුන්ගෙන් පෘථිවි තලය  පිරී යන බවත් සොයාගනියි. ඇය සිය පර්යේෂණ පත්‍රිකා සහ සිය පර්යේෂණාගාරය විනාශ කරයි.

    සැබැවින්ම සිදුවන්නේ කුමක්ද..? ඇය සාර්ථක වේ ද..? සිය පර්යේෂනය විනාශ කරන්නට ඇයට හැකිවීද..? අනාගත පෘථිවිය සොම්බි ග්‍රහණයකින් බේරී ඉතිරිවේද..? ඔබට ඒ දැනගැනීමට අවැසි නම් "කාලාන්තරාව" කියවිය යුතුම යැයි මම යෝජනා කරමි.ඉතා අල්පයක් වන ලාංකේය විද්‍යාප්‍රබන්ධ සාහිත්‍යය තුළ කාලාන්තරාව ද නොමැකෙන ලකුණක් තබන්නට තරම් සුදුසු බව මගේ හැඟීමයි.

    විද්‍යාප්‍රබන්ධයක ලිහිල් අගිසි ඇතැයි කීම නිෂ්ඵල කාරියකි. එහෙත් සිදුවන යම් යම් සිදුවීම් කෙරේ සාධාරණීය ප්‍රවේශයක් තිබුණේ නම් සතුටු වෙමි. ධර්මා ගේ මනස ඩිජිටල් අවකාශයේ ඉතිරිවීම එකකි. මීරියම් ගේ සහ ඇගේ සහයෝගය හැල් සහ ඩේවිඩ් බෝමන්මය හැඟීමක් ගෙන ඒමට සමත් වුව ධර්මා සිය මනෝමය සිරුර ඩිජිටල් අවකාශයේ නික්ෂේප කිරීම පිළිගැනීමට තරම් සාධාරණ හේතුවක් කතුවරිය අපට ඉදිරිපත් නොකරයි. බ්‍රයන් අත් දකින සෑම සිදුවීමක් සිහිනයක් ලෙස හෝ ඔහු මනසේ තැන්පත් වේ නම්, එවන්ම සිදුවීම් බෙදාහදාගන්නා කාලගේ මතකයෙන් ඔහු අත්විඳින සිදුවීම් විතැන් වන්නේ කෙසේද යන්න මට නැඟි තවත් ගැටළුවකි.

    නමුත් පාඨකයාට ඉදිරියට නොයාමට තරම් එම සිදුරු බලවත් නොවේ. කියවන්නා කතාවේ අවසානය තෙක් තෙක් නොයිද සිදුවන සියළු සිදුවීම් ගලපමින් පටලවාගනිමින් කතාව ලෙහා ගන්නට උත්සාහ ගැනීම් අතර සිදුවන පූර්ව නිගමන වැරදී යාම පිළිබඳ ඇතිවන, තමා වෙතම සිනාසෙන්නට සිදුවන අයියෝමය සාකැස්මික හැඟීම උපරිමයෙන් අත්විඳින්නට වීම පිළිබඳ ව වන තෘප්තිය බොහෝ කාලයක් මනසේ ඉතිරි වන බව නම් ඒකාන්තය.

කාලාන්තරාව

කර්තෘ - අමාලි අනුපමා මල්ලවාරච්චි

ප්‍රකාශනය - එස්. ගොඩගේ සහ සමාගම

මිල - රු.900.00

පිටු - 184

ඇගයීම - 4/5