වරද...

අලුත් වැස්සකට හිත පුරා

ගත තෙමාගත් බොල් පොළව

දිය කඩිති මඩ කඩිති ගත පුරා තියාගෙන

ආකාසෙට හිනාවෙන වෙලාවක

හිතේ හැටියට අයිස් වැහි  වතුරෙන්

සල්ලි නොගෙවම නාගත්ත

කුසුමා ඔති ගෙ කැහැටු කොල්ල අපේ ගේ ඉස්සරහ

වෙව්ල වෙව්ල හිනාවීගෙන

“ ආ.. මූ නේද අර සයිමගෙ කොටුවෙ

මයියොක්ක හාරල අහුවුණේ

හොර හැත්ත ...
මොන විජ්ජුම්බරයක් කොරයිද දන්නෑ

ඇහැ ගහං ඉන්න වෙයි ”

හිත එහෙම කියද්දි  ඇස් විමසිල්ලෙ ඉදිද්දි

තාවර වෙවී තෙපර බබා යාප්පුවෙන්

ඉල්ල ගත්ත පරණ වෙච්ච ඉටි රෙද්දකුත්

තුරුළුකොර ගෙන ආපු අහටම පියෑඹුව

රටක් රාජ්ජයක් හම්බවුණා වගෙ

“ උං හිටපු ගේ කඩං වැටිලලු වැස්සට

පොඩි එකාව මුවා කරන්න වෙන්නඇති “

අත්තම්ම එහෙම කියාගෙන ගෙට ගියා

අම්මට කතා කරල රෑට මෙහෙ 

ඉන්න හරිගස්සල දෙන්න ඕන
පව් පොඩි උං....