එන්න මල් පිපී දැයි බලන්න..

                                      හිස් පිටුවක කවියක් කතාවක් ලියනවට වඩා අමාරුයි ජීවිතේ ලියන එක.. මේ මේ විදියට වෙන්න ඕන කියල සැලසුමක් නැතිඅනාගතය අපට ඕන ව්දියට අතීතයෙ දවසකදි කපල කොටල අපි විසින්ම හදාගෙන පස්සෙ අමතක කරල දාල අනාගතයෙ දවසක ඒකෙ ප්‍රතිඵල ලැබෙන කොට අපි ඒකට දෛවය කියල බොරු නමක් කියනව.
කොටින්ම අපේ ක්‍රියා මත ලැබෙන ප්‍රතික්‍රියාවන් වල වගකීම අපේ අතේ ම වග පිළිගන්න එක පැහැර හරිනව. ඇත්තටම හිතල බලන්න. ඔබට සිද්ධ වෙන හැම දේම සිද්ධ වෙන්නෙ යම් දවසකදි ඔබ ඒ දවස සැලසුම් කරපු නිසාඊයෙ දවසෙ ඔයා විභාගයක් අසමත් වුණා නම් ඒකට වැරදි ඔබ  ඔය කියන දෛවය එහෙමත් නැත්තං කරුමය වෙනත් විදියකට කියන්න කැමතී නං කොහෙවත් ඉන්න ග්‍රහයෙක් නෙවෙයි. ඔබමයි. ඔබ ඔබේ අරමුණ වෙනුවෙන් කැප වුණා නම් ඒ වෙනුවෙන් පෙනී සිටිය නම් ඔබේ ඉලක්කයට ඔබ මාර්ගය සකස ගත්ත නං කවදාවත් ඔබ කාටවත් නොබැණ ඉන්න තිබුණ. හොදම උදාහරණය තමයි ඔබ යම් කිසි දෙයකිං සාර්ථක වුණාම මං මෙහෙම කළා මං අරෙහෙම කලා ඒකයි අද මොහම ඉන්නෙ කියල ඔබගෙම වචන. ඉතිං අසාර්ථකත්වයත් ඔබගෙම ක්‍රියා මතමයි සිදු වෙලා තියෙන්නෙ නේද.. ඔයාට අරමුණක්,අධිෂ්ටානයක්,උවමනාවක්, සහ ඉලක්කයක් තියෙයි නම් ඔබට අවශ්‍ය දේ ඔබට ලැබෙන එක වළක්වන්න කාටවත් බෑ. ඒකයි කොයියෝ එයාගෙ alchemist පොතේ එක තැනකදි කියන්නෙ ඔබට යමක් අවශ්‍ය වී නම් මුළු විශ්වයම ඔබට එය ලබා දීමට පෙළගැසී සිට්න බව. නමුත් කොයියෝ යමක් නොකිය මග හරිනව. එ් මොකද්ද කියල හොයාගන්න ඕන ඔබ. එහෙම නැතිව ඔබ නිකං ප්‍රාර්ථනා කළ පළියට ඔබට කිසි දෙයක් නිකං දෙන්න කවුරුවත් සැදී පැහැදී නැති වග මතක තබාගන්න.

                                                 සමහරවිට ගිය අවුරුද්දෙ ඔයා අඩුවෙන් අඬල වැඩියෙන් හිනා වෙන්න ඇති. නැත්නං වැඩියෙන් අඬල අඩුවෙන් හිනා වෙන්න ඇති. ඒ හැම වෙලේම ඔබ කියන්න ඇති ඒ මගෙ කරුමෙ, ඒ මගෙ දෛවය, ඒ මගෙ වාසනාව කියල. මතක තියාගන්න ඔබ ඔය කියන දේවල් නිකංම නිකං වචන විතරක් වෙන්නත් පුළුවං බව. ඔබට වාසනාව හම්බුණා කියල නිකං අත්පා අකුලං ඉන්නව නං ඒ වාසනාව ඔබ එක්ක දිගටම නොඉන්න පුලුවං වගේම කරුමෙ කරුමෙ කිය කිය නිකංම හිටියොත්  කරුමෙ ඔබත් එක්ක හෙවනැල්ල වගෙ රැදෙන්න ඉඩ ඇති බවත් මතක තබා ගන්න. මොකද හැමදේම තීරණය වෙන්නෙ ඔබගේ ක්‍රියාව මතම පමණක් නිසා.

                                                 මතක තබාගන්න වාසනාව වගෙම කරුමෙ නැත්තං අවාසනාව කියල කියන්නෙ මිනිස්සුම ඇති කරපු එකිනෙකට සාපේක්ෂව වෙනස් සංකල්ප දෙකක් පමණක්  බව. ඒවා වෙනස් කරන්න පුලුවං වෙන්නෙත් මනුස්සයන්ටම පමණක් බව.

                                                 ඉතිං මේ 2016 දි ඔබට පුලුවන් අලුත් කෙනෙක් වෙන්න වෙනස් කෙනෙක් වෙන්න. ඒත් ඔබට ඒ වෙනුවෙන් මහන්සි වෙන්න වෙනව. ඒ වෙනුවෙන් කැප වෙන්න වෙනව. හැමදාම රත්න ශ්‍රී ගෙ වස්සානය කවි පංතිය කියවල පැත්තකට විසි කරල නිකං ඉන්නව නං ඔබට කටු  කොහොල් පරදල මල් පිපෙනව බලන්න බැරි වෙනව. ඇත්තටම කටු පොකුරු සිප නොගෙන කොහොමද ඔබ මල් පිපෙනවද බලන්නෙ. එහෙම නැතිව හැමදාම ඔයාට බෑ ඔයාගෙම දේවලට , ඔයාගෙම වැරදි වලට අනුන්ට බනින්න.  ඔයා කඩේ විකුණන්න තියෙන පොඩි පොඩි කවර වල පස් ටිකක් දාල හිටවල හෝමෝන ගහල බලෙන් මල් පුප්පල තියෙන රෝස පැලයක් ගෙනත් පැත්තකිං තියෙන්න ඇරල  අර මල පරවෙලා කාලයක් ගිහිල්ලත් අලුත් මලක් පිපුණෙ නෑ කියල අර වෙළෙන්දත් එක්ක පරල වෙනව නං වැරැද්ද ඔබේ මිස ඒ වෙළෙන්දගෙ නොවන බව මතක තබාගන්න. ඒ අර මල් පැලේ කඩෙං ගෙනාවට නොවෙයි. එහෙනං ඒ  ඇයි කියල කල්පනා කරල බලන්න.

ඉතිං මල් පිපිලද කියල බලන්න කලිං ඔබ කරන්න ඕනෙ මොනවද. ඒ සියල්ල ඔබේ තේරුම් ගැනීම මත තීරණය වේවි.. ඔබට සුභ නව වසරක් වේවා....

මල් නොමැත කොතැනකත්
අනුන්ගේ ගසෙක
 නුඹ නමින් පිපෙන…